قصيدة غزل مهدات الى اخوية نوار الانصاري

لوحه
نوربوجه نور البيك مالـــــــــه حــدود
اجمل لوحه رسمت ريشة المعـــــــبود
تفصال اعله كدك فصلاك وعـــــــــــود
زادت وصله منك حطهـــه بيــك اردود
بس للشوف يمكن ربــــــــــك امسويك
وباب الشوف انت وانت هالــمســـدود
كتلة ضوء انت ومن تجينــه تصيـــــر
(كتلة)ابرياء بلاجرم مشـهـــــــــــــود
قاموسك ضحايه مــــــــن الالف للياء
كلهه تروح عنك وانت بس مــــوجود
نوصفك بالغلط مرات نطــــــــرد عين
ناسك خلصت نص مات نص مـطرود
عنك موحلو كلناهه شدهــــــــــــة بال
عاين بالوجوه ايبين المقصــــــــــــود
تزعل كلنه نزعل ترضه غيــــر نموت
تضحك الله يعلم تحرك النــــه اجـــدود
موش عيون تاهت النه بيــــك حلــوك
تاهت ياحلونه بنص حلاتــــك جـــــود
صفنة ليل طولك والخصـــر ناطـــــور
فوك اسوار مجدك كاعــــدالنه اكعـــود
صناكر عالصدر حطــــو عمامـك خاف
واحد تدنه نفســــه ويلزم العنكـــــــود
وجناتك شكر قــــندول وجهك جــــــام
ابيض والهـــــدوم انوب كلهن ســــود
شطالع غيــــر ربك لطف بينه اليـــوم
لوواكف شويـــــه جارحت فرهـــــــود
تمشي ولو مشيت الكاع تمشي اويـاك
اوكف خلهه تمشي واحنه نوصل عود
وتريد الصدك ظل امشي تعرف ليش؟
بس توكف يجي ويلتم عليك الـــــدود
.......................

انت لوحدك
كالو وصفو عنك حجولي هـواي
وكالو كل حلو وهم تلكه بيه لوله....
ومن شفتك شفت مابيك هلكد لول
بس عيـن التشوفك تنكلب حــوله....

اريـد اكعد واجرلي ونحـــــوله ....
واخبره اسباب ضعفي ونحوله ....
النحولي شلعو كلبي ونحولــه ....
خيرهم شبــع كفران بيـــــــــه
يالحسنك بخت وببابـه احني سنيــن
بابك لاتسده بوجـه اليكصـــــــــــــــــــدك ....
انه بحضرتك رايدلي بس مـراد
حته احلف وكلهم من بخت جـــــــــــــدك ....
طولك معجزه ومن تمشي مدري شلون
ظلك يفتخر ويحــــــــــــــــــــــاول يقلـدك....
كبلك؟ عاصفه ومن توصل انت اعصار
شك ثوبه المحيط وماجزر مــــــــــــــــدك....
اشتاكك تجي ولو جيت اموتـــــــن بيك
ومن سدك اخافـــــــــــــــــــن واختل بسدك....
يالكلك لغز ماصحله كـــــــــــــل تفسير
والرايد يفسرك لازم بكــــــــــــــــــــــــدك....
يبدي من الجدم لاخر مجسم بيــــــــــك
ومناه للصبح مايوصـــــــــــــــــــل لحدك....
انت لوحدك بس جنهه كلهـــــه اوياك
يمته اوياك اصيرن واخذ الوحـــــــــــدك....
الشافك بالوصف كض كلبه بيده اعليك
والشافك صدك رد يبجــــــــــي من عندك ....
خصرك بالضبط مركز ثقل للعيــــــــن
ياعين التمرهه وتقبـــــــــــــــــــل اتهــدك....
خدك من يصير اكبال حلكــــــي يدوخ
شيظل بالحلك مــــــــــــــــــن يوصل لخدك ....