مجروحين نرجع فوك الجروووووووووووووووووح

بملابسنه أثر لنيابة العوز
وبنصهن أثر ناس احنه باقين

شبه كرصت خبز ركعتنه عالثوب
تشهينه أونون هو الخبز وين

شنكل للحبايب هذا موديل
افترض قنعن صفار وجوهنه منين؟

تلهمنه الشماته بهيج مقياس
جكاره وطاحت بحلك المساجين

ومجروحين نرجع فوك الجروح
نواسي امنه الدمعهه اعدال شطين

يمه فطور رجلج ترفه والناس
خشنه عيونه وماشافتج زين

وتذكرنه ابونه النطلع وياه
وعلينه جروح ردت ذيج السنين

يادرب النطبه وكال مكطوع
حفاي ونفر كل الدرابين

يخاف أنحرجه ثاري الدرب مفتوح
الدرب مكطوع يقصد بي دكاكين!!

ابويه بلاي في لاثمر لاكاع؟
وهو بمسحاته علاهه البساتين

بجه من شاف تعبه تعبة بسلال
وخضار السعف طاح بدمعه العين

اليكلي أصبر يجي الماعون متروس
مايدري احنه بعناهه المواعين!

نصبه اعله الجريده وننوي عالزاد
وتزلف عينه ونقره العناوين

ويه اللكمه الاولى انذبه ونكوم
اذا كل كلمه بيه أتلاثه ميتين!

نحس بالناس لكن مايحسون
وعدهم حلوه لو كالو مساكين

اعله طين ابيوتنه استغرب يقلدون
وهمه اجسامهم مخلوقه من طين

ملينه الحجي وملينه هل الحال
ركض بينه العمر لاح الثلاثين

وماكلك الدين الهامت الراس
الهوه لو ينملك منشمه بالدين

لأن ضكنه الطعن لبحجي اللسان
وكلنه سوايت الله اعله السجاجين