قصيدة روعة مشايف مثل طولج

ما شايف مثل طولج وبعد ما اشوف واقنع عيني بيش وتقنع وترضى
وانت خيالج يغازلج من تمشين وبعضه يلوم بعضه وياكل ابعضه
كبلج ما جنت شاعر غزل معروف
وشعر البيه رفض ويرددونه الناس من خزرة عيونج يستمد رفضه
يالكلج براءة ونور يعكس نور وتشوفج عيون الناس المغمضة
الشارع بيه صداع يصيرمن تمشين وطوله يكوم يفتر يهدم بعرضه
وابو الطيب يغض النظر جان يكول بس لو شاف طولچ فنه اذا غضه
المستشفى اذا من بابها تمرين عراضة لشوفتج تتضاهر المرضى
خط احمر جمالج رسم فوك الكاع وحظر تجوال طولج وحده يفرضه
الفتنه الطائفية عيونج الحلوات عليهه احنه اختلفنه وبعد ما نرضى
والامن ما يستقر وتفرضه شرطة وجيش بس بسلاح حسنج نكدر نفرضة
والفوضى ال بالبلد مو من سياسيين الفوضى ال بالبلد من شعرج الفوضى
وغلط احمد مطر ميخلده التاريخ لان عن لون خدج ما كتب ومضة
كاغد ماي خدج والهوى يهز بيه ومن كد رقته بالهوى ما يرضى
حضى بيج الندى بخدج طبع نيشان جا شتسوي بيج جفوفي من تحظى
عصر النهضة داخو بيه ما شافوج وانت الشايلة بخصرج الف نهضة
الشمس هاي الشمس من تسد باب الليل تنزل على شعرج حتى تتوضى
ولان تعكس بياضج والبراءة البيج وحدها المراية تكوم تتشظى
قرضة من الشمع بالظلمة نطلب نور وانت النور منج يطلب القرضة
بالزي من اشوفج كلي اصيرن عين وافظ كلشي من أدية وخلكي ما افضة
مثل الظل وراج عيوني مصلوبات ودرب الجامعة خليت بيه رضة
الوزير اليوم اي لازم يحط شروط لنظام الجامعة وعالمجلس يعرضه
ويصدر قرار وكلهه تعمل بيه وتنصاع العمادة وتعمل بوعظه
طولج من يمر يم الاستعلامات عميد الجامعه يوكف صنم لحظة
وباب الجامعه من يمه اذا تمشين رئيس القسم لازم يركضله ركضه
مو لاجل العلم بالجامعه الطلاب علمودج ترة الطلاب مكتضة
كراج الجامعة صنطة ويبجي العين بس لمن تجينا تصير بيه ركضة
المحاظر بالدرس ما يحفظ الموضوع لان ملتهي بثغرج رايد يحفضه
وبالروضة خبر طش راح تتعينين علمودج زلم سجلت بالروضة