علة غيرك جذب ما ترهم الروح

علة غيرك جذب ما ترهم الروح
أيام البعد جبناهه صفنات
بين آمالنه وحيرة أمرنه
تجي لو ماتجي كضينه الأيام
وصرنه وياهو يدري شلون صرنه
صبرنه متاع صار وبعدك بعيد
وتجوع أيامنه وتاكل صبرنه
شبعد يالماتمر مو كافي الغياب
وصار هواي ننتظرك تمرنه
ونذر نالك تجي وندعيلك تعود
وعمت شجينه وشيب نذرنه
وعلى غيرك جذب ماترهم الروح
ومن غيرك يسد حاجة نظرنه
يبن الناس غيرك ماكو موضوع
وهلبت بالجذب شخصك ذكرنه
نسولف بيك لاخر لحظة بالليل
وترد من الصبح تشغل فكرنه
ماعنت عليك بساعة اغروب
روحك وشتهت تسمع خبرنه
ياروح الكلب ياعزة الروح
يادمعاتنه وهمنه وسهرنه
يا أول عهد ياتالي الأيام
يلعب صبانه ياشيبة كبرنه
أشكد كبلك مشو ماسلو الروح
ولابغيابهم كسروا ظهرنه
أمنين أنجيب مثلك حتى ننساك
ومنو المثلك يعوضوك لوخسرنه
الشبه كل أربعين حجاية تنكال
وإذا واحد يصح جان أنتظرنه
البعد نيران كبره ايبخر أدموع
بس ايزود يتبخر بصرنه
تعال الجرح جّن ومارضه يهيد
وحجينه وياه ماينفع عذرنه
شبك روحه أعله طوله وينكت أجروح
وكضينه أخيوطنه وملت أبرنه
شوكت يندك علينه ويضحك الباب
ويترس بيتنه وصوتك يسرنه
وترد انته ويجن الراحن وياك
وتجيبه وياك يلماخذ عمرنه