قصيده للعراق الجريح

بحق العراق الجريح


--------------------------------------------------------------------------------

اكو دكان يمنه وعزل من الدين
وراعيه الدمع مجفي عله خدينه

اليطلبهم بعد بالحلم ينشافون
كلهه تذبحت ياهو اليسد دينه

وطلعلي سجل الدين نكلّب بي
شمايكلبله صفحه تكله خلينه

لأن الدنيه صيف ونار هسه الكاع
وذا تكلبنه خاف الكاع تجوينه

وسولفلي عليهم كال ذوله الناس
مصارعهم اكثرهن شافه بعينه

سولفلي عله عامل بالفجر ذبحوه
وترسو طاسته من دم شرايينه

وبخيط البنايه جتفو رجليه
وبمسحاته كطعوا ركبة يمينه

وابو الدكان يحجي ومعترض عالحال
اذا ذبحو العامل ياهو يبنينه

وذكر حالة طفل شايل بديه خمسين
وكدامه الاجل فتح دكاكينه

ومن طك المفخخ ماشفتله اثار
تفجر بس بقن بجفوفه خمسينه

ماطار من اديه خمسينه بالتفجير
خمسينه بقن بس طارن سنينه

واكو شايب توذرعمره بالتسعين
وعله طول الارض طشروا تسعينه

ومن ذاك الوكت مافتح الدكان
لأن برفوفه شايل صور ميتينه

وكلهه تهون سهله يكلي ابو الدكان
بس منظر بجاله الله ونبيينه

بشارعنه امس صلينه عالميتين
صلاةالموت الهم والنه صلينه

لأن شفنه علامة موت بالتابوت
الشارع كبر وصلت درابينه

انفجر تابوت ميت كطعانه اوصال
بحيث تشوف فوك الروس رجلينه

ربك من خلق كلاربعين بطين
حته بدنيته يصير الشبه بينه

وصارت بالذبح تشبه بعضه الناس
لأن كل اربعين تحزهه سجينه

وادم ماتعرف الله ولا انسان
كفروابالاله ومرغو طينه

وظل يحجيلي وانه عيوني عالدكان
شفت جف لازك بكصة حياطينه

وسألناه بالدمع ياجف اجيت منين
من تفجير امس كال احنه ضلينه

معاميلك يعمي يحاجي ابو الدكان
معاميلك يعمي شبيك ناسينه

اجيت انخاك نخوه ابيوت اهلنه ابعاد
لأن ماكو كبر محد يمر بينه

ولحمنه عاله التراب وريحه طلعت بيه
وردت ماي الورد بالدين تنطينه

واذا مابيك همه بداعت العباس
احلفك كل لهلنه تدور علينه

كله منين اعرفك ماكو بيك اوصاف
كله افتح سجلّك راح تلكينه

تلكه اسمائنه مكتوبه بالدكان
واوكف يم جثثنه وصيح اسامينه

وفتح صفحة سجلّه يطلع الاسماء
وطبك روحه السجل ماينطي ميتينه
واحنه شعب كامل ننطي بس عدلين
وعدد ميتينه صار بضعف عدلينه
قيصر العشاق

تسلم القيصر على القصيدة الرائعة بحق العراق

فعلا عراقنا جريح

مشكو ضفار

هله بالعراق

تسلم عالقصيده الرائعه

مشكو ابو حسين